تحریر:سمیرا صدیق
بدلتے موسم۔۔۔اور اکثر لوگ۔۔۔روز اول سے ہی۔۔۔انہی موسموں کی طرح۔۔۔بے وفا۔۔۔ہزاروں روپ لیے۔۔۔سبز باغ دکھاتے۔۔۔زندگیوں کو بے نام و نشان راستوں پر۔۔۔ بھٹکتا چھوڑ کر۔۔۔۔منظر سے ہٹتے گئے۔۔۔۔
ان کثیر لوگوں کے ہجوم میں۔۔۔وہ قلیل لوگ۔۔۔ سوچوں اور خیالات کے افق پر جگمگاتے روشن ستارے بن کر نمودار ہوئے جنہوں نے باطل سے حق اور کفر سے ایمان کی تبدیلی کا سفر کیا۔۔۔اور پھر وہ۔۔۔بدلتے موسموں میں نہیں بدلے۔۔۔
بدلتے موسموں میں ابوبکر،عمر،عثمان و علی(رضوان اللّٰہ علیہم اجمعین) بھی نہ بدلے۔۔۔اور دنیا نے دیکھا۔۔۔صحرائے عرب پر ابھرتا۔۔۔آگ برساتا سورج۔۔۔وادی بطحاء کی تپتی ہوئی گرم ریت۔۔۔اس گرم ریت پر پاؤں رکھنا بھی محال۔۔۔ اور وہ کیسا شخص تھا۔۔۔جس کے وجود کو اس ریت پر گھسیٹا جا رہا تھا۔۔۔کہ وہ بدل جائے۔۔۔ لیکن وہ نہ بدلا۔۔۔اور *بدلتے موسموں میں خود کو نہ بدلنے والے کو دنیائے اسلام مؤذن رسول صلی اللّٰہ علیہ وسلم کے نام سے جانتی رہے گی۔۔۔ان شاءاللہ۔۔۔
بدلتے موسموں نے عامر بن فہیرہ (رضی اللّٰہ تعالٰی عنہ) کوبھی نہ بدلا۔۔۔انہیں اس قدر اذیت دی جاتی کہ ان کی عقل جاتی رہتی اور انہیں سمجھ میں نہ آتا کہ وہ کیا کہہ رہے ہیں۔۔۔
موسم بدلتے رہے۔۔۔دوپہر کی چلچلاتی دھوپ میں ابو فکیھه(رضی اللّٰہ تعالٰی عنہ) کے پاؤں میں لوہے کی بیڑیاں پہنا کر۔۔۔ان کے کپڑے اتار کر۔۔۔جلتی ریت پر لٹا دیا جاتا۔۔۔پھر ایک بھاری پتھر ان پر رکھ دیا جاتا۔۔۔ مسلسل اذیتیں بھی انہیں بدل نہ سکیں۔۔۔
بدلتے موسموں نے خَبّاب بن اَرت(رضی اللّٰہ تعالٰی عنہ) کو تب بھی نہ بدلا جب ان کی مالکن ام اَنمار لوہے کا جلتا ہوا ٹکڑا لے کر آتی۔۔۔اور ان کی پیٹھ پر ڈال کر انہیں کفر میں پلٹنے کا کہتی۔۔۔وہ انکار کرتے۔۔۔اور اس انکار سے ان کا ایمان مزید بڑھ جاتا۔۔۔۔
بدلتے موسموں نے آل یاسر(رضی اللّٰہ تعالٰی عنھم)کو بھی نہ بدلا۔۔۔جب سرزمین عرب کی سخت دھوپ کی گرمی میں آل یاسرکو تپایا جاتا۔۔۔
بدلتے موسموں نے مصعب بن عمیر(رضی اللّٰہ تعالٰی عنہ) کو بھی نہ بدلا۔۔۔جب ان سے شاہانہ زندگی چھین لی گئی۔۔۔
بدلتے موسموں میں نہ بدلنے والے۔۔۔ہر زمانے میں گنے جاتے رہے۔۔۔لیکن ان کی قلت ہمیشہ کثرت پر غالب رہی۔۔۔
اسی لیے تو۔۔۔وقت بدلا۔۔۔موسم بدلے ۔۔۔صدیاں بیتیں۔۔۔سال گزرے ۔۔۔راہ حق کے مسافر۔۔۔ بدلتی رتوں میں خود کو نہ بدلنے والے۔۔۔ہمیشہ دلوں کے حکمراں بن کر۔۔۔کتنی ہی زندگیوں کے لیے۔۔۔مشعلِ راہ بنتے رہے۔۔
